Monday, December 2, 2013

Boom, bomer, boomste?

Hierdie is beslis nie 'n boomblog nie, óf enige iets te make met plantkunde nie, maar dit is waar dit alles begin het. Hierdie avokadopeerboom is my wegkruipplekkie. My blaaskans. My 5 minute afskakel weg van alles en almal af.

Daar is vir my soveel simboliek in 'n boom. Daar is die "boompie" boek van Hettie Brittz met roosboompies en sierboompies en palmboomkindertjies! Koning David het kinders beskryf as olyfbome. Het jy al 'n klomp olyfboompies bymekaar gesien? Dis 'n woesterasie soos hier in my huis!

Dit is hoeka weer boomtyd... Is daar nie ook 'n boom in jou huis hierdie tyd van die jaar nie?

Die woordjie boom word in nie minder as 60 verskillende verse in die Bybel gebruik nie!

Die eerste Psalm: "En hy sal wees soos ‘n boom wat geplant is by waterstrome..." 

Saggéüs het vooruit gehardloop en in ‘n wildevyeboom geklim, sodat hy Hom kon sien... Ek sal wat wil gee vir so 'n (blaas)kans!

En dan is daar ons wonderlike Afrikaanse spreekwoorde:

Buig die boompie solank hy jonk is
en die appel val nie ver van die boom nie.
Boompie groot, plantertjie dood;
hoë bome vang die meeste wind.
'n Boom gooi altyd 'n skaduwee,
en soos die boom val, daar bly hy lê.

My gunsteling: Vir die swartste moerbei klim 'n mens die hoogste in die boom!

Sal ek deur die bome die bos nie sien nie?
Of die bos vanweë die bome nie sien nie?

'n Avokadopeerboom was my gunsteling wegkruip- en uitkyk plek as kind. Hoog. Veilig. Onbereikbaar!

Onthou jy nog?


Hoe sal ons dan heet? Wat van Avokadopeerboomblog? Of terug na Avocado tree? Of miskien iets heel anders?

hELP 'N bIETJIE!
Mignon

1 comment:

  1. Mooie bomen blog. Zo leuk om alles in jouw taal te lezen, die toch weer anders is dan het Nederlands. Jouw spreekwoorden kennen we hier niet maar de onze lijken op die van jullie. Jouw boom heet hier: Avocadoboom.

    ReplyDelete

Thank you for stopping by. I would love to hear from you so drop your comment in the box.

Related Posts Plugin for WordPress, Blogger...